Анчелотти Неймардың қазіргі жағдайы туралы пікір білдірді

Италиялық маманның сөзінше, тәжірибелі шабуылшы алаңға көбірек шыққысы келеді, бірақ қазіргі жағдайды барынша кәсіби қабылдап отыр.

«Ол қосалқы құрамда отырғанына толық көнді деп айта алмаймын, бірақ өзін өте жақсы ұстап жүр. Неймар жаттығуларда бар күшін салады. Командадағы барлық ойыншылар оны құрметтейді және жақсы көреді. Ол біз үшін өте маңызды футболшы, өйткені жоғары шеберлігімен қатар өте қарапайым адам. Әрине, ол ойнағысы келеді, бұл – кез келген футболшы үшін қалыпты нәрсе», – деді Анчелотти.

Бапкердің айтуынша, Неймар өздігінен алаңға шығаруды талап етпейді, алайда оның ойнауға деген құлшынысы анық байқалады.

Еске салайық, әлем чемпионаты басталар алдында 34 жастағы шабуылшы балтыр бұлшықетінен жарақат алған болатын.

Неймар осы мундиальда әзірге тек бір матчқа қатысты. Ол Шотландияға қарсы топтық кезең ойынында 76-минутта алаңға шығып, бар болғаны 14 минут өнер көрсетті. Сол кездесуде Бразилия 3:0 есебімен жеңіске жеткен еді.

Әлем чемпионатының 1/8 финалында Карло Анчелоттидің командасы Норвегия құрамасымен кездеседі.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.