«Жеке себептері бар»: «Ертіс» бапкері Швыревтің нәтижесіздігі, Мбодждың жарақаты және ықтимал отставка туралы

Негізгі қорғаушы шілде-тамыз айларында оралады

«Мамаду Мбодж шамамен үш ай бізге көмектесе алмайды – оның менискісі зақымдалған. Төлеуов оны толық алмастыра алды ма? Кез келген ойыншыны алмастыру қиын. Әр футболшының өзіндік қасиеттері бар».

Поэның ерте ауысу себебі

«Байбосынов ойынға жақсы қосылды. Ол бірінші таймда түзету керек болған қателіктерді жөндеді. Жан-Морель Поэ қойылған талаптарды орындай алмағандықтан, біз осындай қадамға бардық».

Алты жеңіліс және медиадағы хейт туралы

«Қатар-қатар жеңіліс командаға бәрібір әсер етеді. Мұндай сериялардың еш жақсылығы жоқ. Ал сынға келетін болсақ, бәрі футболшылардың бос уақытын қалай өткізетініне байланысты: интернеттегі реакцияға қарай ма, әлде жұмысқа назар аудара ма?

Сәтсіздіктерге қарамастан, ұжымдағы микроклимат – қалыпты. Иә, бәрі жанкүйерлердің сенімін ақтамағанына уайымдайды, бірақ матчтарға жақсы көңіл-күймен шығуға тырысады».

Швырев екі жылға жуық голсыз және ассистсіз жүр

«Славаны қолдан келгенше қолдап жатырмыз. Оның бұған қатысты жеке себептері бар – оны жария еткісі келе ме, жоқ па, білмеймін. Өз тарапымыздан ойыншыға барынша жағдай жасап отырмыз», – деп атап өтті белоруссиялық маман.

Қазақстандағы жұмыстың соңы ма?

– Кирилл Петрович, сізді тұқыртып жатқан жоқпын, бірақ тікелей сұрақ: бұл сіздің «Ертіс» тізгініндегі соңғы матчыңыз болуы мүмкін бе?

– Тұқыртпай тұрып, осындай сұрақ қоясыз ба? Мұны басшылықтан сұраңыз.

ҚПЛ-дың тоғызыншы турында «Тобылға» қарсы өткен сырт алаңдағы матчта павлодарлықтар қатарынан алтыншы рет жеңіліске ұшырады. Қазіргі таңда команда турнир кестесінде 14-орында тұр.

«Ертіс» шабуылшысы Вячеслав Швырев соңғы рет 2024 жылдың шілдесінде гол соққан. Сол кезде «Қайрат» сапында «Шахтер» қақпасына (0:3) доп енгізген болатын. Содан бері ол «Ордабасы» мен «Ақтөбе» сапында тағы 17 матч өткізді.