«Барселона» саяси ойынның құрбаны ма? Хавьер Тебас трансферге тосқауыл қойды

Испания футболындағы тағы бір даулы жағдай: Ла Лига президенті Хавьер Тебас «Барселонаның» Испания құрамасының ойыншысы Нико Уильямсты қатарға қосу жоспарынан бас тартуына себепкер болды деген айып тағылып отыр.

Келісімшарттың барлық шарттары келісілген сәтте, «Атлетик» президенті Хон Урьяте Тебаспен жеке кездесіп, «Барселонаның» қаржылық жағдайына қатысты мәліметтерге қанық болған. Бұл туралы спорт заңгері Мигель Галан мәлімдеді. Оның айтуынша, сол кездесуде баспасөз өкілдері де болған.

Тебас клубтың қаржылық есебіндегі кемшіліктерді ашық айтып, Уильямстың агентін трансфердің тіркелмейтініне сендірген. Соның салдарынан ойыншы келісімшартқа арнайы кепілдік тармағын қосуды талап еткен – егер клуб оны тіркей алмаса, басқа командаға еркін ауысу құқығы берілсін деген шарт. «Барселона» бұл талапты қабылдамаған, себебі бұл әрекет алаяқтық схемасы ретінде бағалануы мүмкін еді. Нәтижесінде, Нико Уильямс «Атлетикпен» он жылдық жаңа келісімге отырды.

УЕФА да каталондық клубқа қатысты тергеу жүргізіп, жасырын трансферлік схемалар мен жалған кіріс жазбалары үшін 15 миллион еуро көлемінде айыппұл салды. Егер клуб бұл тәжірибеден бас тартпаса, айыппұл сомасы тағы 45 миллион еуроға ұлғаюы мүмкін.

Осы жағдай испан футболында билік пен ықпал үшін күрестің үдей түскенін көрсетеді. Тебас – клубтарға сырттай бақылау жүргізіп, олардың қаржылық тәртібін қатаң тексеруге бейіл басшы. Ал «Барселона» өз тарапынан жобаларын жүзеге асыру үшін болашақтағы түсімді қазіргі табыс ретінде көрсетіп келген. Соның бірі – әлі қолданысқа берілмеген жаңа «Камп Ноу» стадионындағы VIP-орындардан түсуі тиіс пайда.

Хавьер Тебастың бұл ақпаратты «Атлетик» басшысына дер кезінде беруі – спорттағы бәсекелестік қана емес, терең саяси ойынның бар екенін де аңғартады.

Нәтижесінде, «Барселона» тағы бір маңызды трансферден айырылып, Еуропа футболында клубтар мен басқарушы құрылымдар арасындағы күрес жаңа белеске шықты.