Ресми: Криштиану Роналду Португалия құрамасындағы мансабын аяқтады

41 жастағы футболшы бұл туралы әлеуметтік желілерде жарияланған бейнеүндеуінде хабарлады.

41 жастағы шабуылшы қоштасу сөзін Португалия құрамасы сапында өткізген матчтарынан үзінділермен ұштастырған.

«Ұлттық құраманың жетінші нөмірлі жейдесін тапсыратын уақыт келді. Мен бұл жейдені ешқашан тек өзіме тиесілі деп санаған емеспін. Дегенмен 23 жыл бойы оны әлемнің түкпір-түкпіріндегі стадиондарда абыроймен киіп, қорғадым. Енді оны болашақ ұрпаққа табыстайтын кез келді», – деді Роналду.

Футболшы мұндай қиын шешімдер тек ақылмен емес, жүрекпен де қабылданатынын атап өтті. Оның айтуынша, 2003 жылдың тамызында басталған жолы өмірін түбегейлі өзгерткен.

Роналду ұлттық құрамадағы жылдарын еске алып, бұл кезең тек матчтар, голдар, рекордтар мен жүлделерден тұрмағанын айтты. Ол үшін ең маңыздысы – Португалия халқының қолдауы мен жанкүйерлердің ықыласы.

«Голдар ұмытылады. Жүлделер музейлерде қалады. Рекордтар ерте ме, кеш пе жаңарады. Бірақ уақыт өшіре алмайтын бір нәрсе бар: адамдардың жүрегінен алған орнымыз», – деді ол.

Шабуылшы ұлттық құрама сапында әрдайым бар күшін салғанын, жеңіске жетіп, тарихта қалуға ұмтылғанын жеткізді. Сонымен қатар мансабында жеңістермен қатар, әлі күнге дейін ауыр еске алатын жеңілістер де болғанын жасырмады.

«Мен қателестім, қиналдым. Кейде португалдықтар күткен нәтижені көрсете алмадым. Бірақ ешқашан берілген емеспін және Португалия атынан өнер көрсеткенім үшін мақтануды бір сәтке де тоқтатқан жоқпын», – деді футболшы.

Роналду командаластарына, жаттықтырушыларға, ұлттық құраманың қызметкерлеріне және отбасына алғыс айтты. Сондай-ақ Португалияға алдағы уақытта да армандай білетін жас қаһармандар қажет екенін атап өтті.

«Бүгін ұлттық құрама сапындағы алаңдағы жолым аяқталады. Мен бұл жолдан басымды тік көтеріп кетіп барамын. Жүріп өткен жолымды және Португалия үшін барымды салғанымды мақтан тұтамын. Бірақ мен ешқашан өз халқымның бір бөлігі болудан қалмаймын. Португалияның әр жеңісіне әлі де алаңдап, жанкүйер болып, бірге қуанамын», – деп түйіндеді ол.

Криштиану Роналду Португалия құрамасындағы алғашқы матчын 2003 жылдың тамызында өткізді. Ұлттық команда сапында 2016 жылғы Еуропа чемпионатында және Ұлттар лигасында екі рет жеңімпаз атанды. Сондай-ақ Еуропа чемпионаттарының күміс және қола жүлдесін иеленді.

Роналду Португалия құрамасы үшін 234 матч өткізіп, 146 гол соқты. Бұл – ұлттық құрамалар деңгейіндегі рекордтық көрсеткіш.