«Сәтпаевқа үлгі болады»: «Бернли» бапкері Джейми Вардидің алдағы дебюті туралы

39 жастағы шабуылшы италиялық А Сериясында өнер көрсеткен кезінен қалған бір матчтық дисквалификацияға байланысты апта ортасындағы «Рексемге» (1:1) қарсы ойынды өткізіп жіберуге мәжбүр болды. Енді Варди ресми түрде жаңа командасының жейдесін киюге дайын, алайда команданың бас бапкері Ники Хайен жанкүйерлерге ескерту жасады: АПЛ-дың экс-чемпионы толық 90 минут ойнауға әлі бабына енген жоқ.

«Ол шамамен 20 минут ойнай алады делік. Джеймиде маусымалды дайындық дерлік болған жоқ. Ол көп жүгіреді, бірақ бұл ресми немесе тіпті жолдастық кездесулерде ойнаумен бірдей емес. Біз команданы қайта құрып жатырмыз, мен шыдамдылық танытуды сұрайтын ең соңғы адаммын, бірақ халықаралық үзіліске дейінгі осы қиын кезеңнен өтуіміз керек», – деп атап өтті Хайен.

Бапкер тәжірибелі шабуылшының киім ауыстыратын бөлмедегі рөліне ерекше назар аударды. «Бернлидің» жас таланттары, оның ішінде жалға алу құқығымен өнер көрсетіп жүрген 18 жастағы қазақстандық Дастан Сәтпаев үшін тәжірибелі сұрмерген басты үлгі болуы тиіс.

«Біріншіден, ол гол соғуды біледі, сондықтан да біз онымен келісімшартқа отырдық. Бірақ ең маңыздысы – ол ақылды ойыншы. Біздің шабуылдағы футболшылар одан көп нәрсе үйрене алады, ол – біздің киім ауыстыратын бөлмедегі үлгі болуы тиіс ойыншы. Оның тәжірибесі орасан зор және ол жас футболшыларға бағыт-бағдар береді, сондықтан бұл біз үшін шынымен де жақсы трансфер», – деп баса айтты бапкер.

Хайен сондай-ақ клубтың жұлдызды ардагер үшін бәсекелестікте қалай жеңіске жеткенін түсіндірді: Варди жай ғана қосалқы құрам ойыншысы емес, алаңдағы негізгі тұлға болғысы келген.

«Басқа командаларда ол 5-10 минутқа шығатын қосалқы ойыншы, үшінші немесе төртінші шабуылшы болар еді. Ал мұнда ол команданың өміріне толықтай араласатынын және маңызды ойыншыға айналатынын сезінді. Тек алаңда ғана емес, сонымен бірге жас футболшыларды алға сүйрелейтін тәлімгер ретінде де», – деп қорытындылады маман.

2026/27 маусымындағы ағылшын Чемпионшипінің жетінші турындағы «Суонси Сити» мен «Бернли» командалары арасындағы матч сенбі, 12 қыркүйекте Қазақстан уақытымен 19:00-де өтеді. Ойын «аққулардың» алаңы Swansea.com Stadium аренасында өтеді.

Алдағы «Суонси Ситиге» қарсы ойынды, сондай-ақ «Дерби Каунтимен» өтетін келесі матчты Дастан Сәтпаев жарақатқа байланысты өткізіп алады. Еске сала кетейік, 18 жастағы қазақстандық шабуылшы «Мидлсбромен» (1:1) өткен сәтті ойында тізе асты сіңірін жарақаттап алған және қазіргі уақытта лондондық «Челсидің» базасында оңалту курсынан өтіп жатыр.

Кадрлық дағдарысқа қарамастан, «Бернли» бапкерінің көңіл-күйі көтеріңкі. Ники Хайен халықаралық матчтарға арналған алдағы үш апталық үзілістен кейін (қыркүйектің соңы – қазанның басы) Сәтпаевтың, сондай-ақ оның командаластары Джош Каллен мен Джейдон Банельдің толық қатарға қосылатынына үміттенеді.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.