Тчуамени Вальвердемен болған жанжал жайлы мәлімдеме жасады

Мадридтік «Реалдың» жартылай қорғаушысы Орельен Тчуамени командаласы Федерико Вальвердемен болған жанжал туралы БАҚ-та тараған ақпараттан кейін мәлімдеме жасады. Бұған дейін клуб екі ойыншыны да € 500 мың көлемінде айыппұлмен жазалағанын хабарлаған еді.

«Осы аптадағы жаттығуда болған жағдайға жол беруге болмайды. Мұны футболда болсын, мектепте болсын, жастарға қандай үлгі көрсетуіміз керектігін ойлай отырып айтып отырмын. Кімнің дұрыс, кімнің бұрыс екеніне қарамастан, кез келген жанжалды барынша сабырлы түрде шешу қажет.

Ең алдымен, клубты қандай жағдайда көрсетіп қойғанымыз үшін өкінемін. Жанкүйерлер, клуб қызметкерлері, командаластар, басшылық — барлығы маусымның осылай өтіп жатқанына қатты көңілі қалғанын білемін. Бірақ көңілсіздік бәріне ақтау бола алмайды. Мұндай жағдайлар кез келген киім ауыстыратын бөлмеде болуы мүмкін, алайда бұл мадридтік «Реалға» лайық емес. Әсіресе, бұл әлемдегі ең көп талқыланатын клуб екенін ескерсек.

Интернетте резонанс үшін небір ойдан шығарылған әңгімелер тарайды. Сондықтан айтылғанның бәріне және жалған нұсқаларға сене берудің қажеті жоқ.

Қазір кім не істеді, кім не айтты, кімнің дұрыс не бұрыс болғанын талқылайтын уақыт емес. Мен клубтың шешімін қабылдаймын және бұл санкцияны құрметтеймін. Келіспеушіліктерге қарамастан, біз әлі де бір отбасымыз. Бірақ команданың мақсаттарын бәрінен жоғары қоюымыз керек.

Мен командадан кешірім сұрадым және барлық мадридистерден де кешірім сұрағым келеді.

Енді алға жылжитын уақыт келді. Бар назарымыз «эль класикоға» және маусымның қалған бөлігіне аударылған. Клубты өз орнына — биік шыңға қайтаруымыз керек», — деп жазды Тчуамени әлеуметтік желідегі парақшасында.