AS: Клопп "Реалды" басқарғысы келмейді

Алихан Ибраев

Автор

19.04.26, 12:10

Red Bull тобының спорт директоры Юрген Клопп, оны мадридтік «Реалға» тағайындаумен байланыстырып жүргеніне қарамастан, қазіргі қызметінде өзін жайлы әрі бақытты сезінеді. Бұл туралы AS басылымы хабарлады.

Сурет: ашық дереккөздерден

Дереккөз мәліметінше, 58 жастағы маманның болашағы кем дегенде тағы бір маусым «корольдік клубпен» байланысты емес. Клопптың ұзақмерзімді мақсаты — Германия ұлттық құрамасын жаттықтыру мүмкіндігі, алайда бұл оның басты басымдығы емес.

Неміс маманының бапкер ретіндегі соңғы жұмыс орны — 2015 жылдан 2024 жылға дейін тізгінін ұстаған «Ливерпуль» клубы болды. Клопптың жетекшілігімен мерсисайдтықтар Чемпиондар лигасын жеңіп алып, Англия чемпионы атанды.

Қаңтар айынан бері мадридтік «Реалдың» бас бапкері — Альваро Арбелоа. Бұған дейін БАҚ-та испандық маманның жазда клубтан кетуі мүмкін екені хабарланған еді.