"Астана" қорғаушысының алаңға қашан оралатыны белгілі болды

«Қазір Кажуколовас Дубайда мамандардың бақылауымен қарқынды жаттығып жатыр. Ол күніне 4-5 сағатты оңалтуға жұмсайды: жүгіреді, дене дайындығымен айналысады. Бір аптадан кейін Астанаға ұшып келіп, қалпына келудің соңғы кезеңінен өтеді. Жазға қарай бабына келеді деп күтіп отырмыз.

Кипрас — қайсар жігіт, сондықтан тізесіндегі жарақатқа байланысты мойымайды. Мұндай деңгейде әлсіздер болмайды. Дағдарысқа байланысты кету туралы ой да болған жоқ: «Астана» — үлкен клуб, оған бұл жерде жайлы», — деді агент.

Миколюнас сондай-ақ экс-«Брайтон» қорғаушысының өткен жылы мансабын қайда жалғастыруы мүмкін болғанын айтты:

«Ол Қазақстанға үйреніп, бас бапкермен жақсы тіл табысты. Әрине, 25 жаста өсе бергің келеді, бірақ әзірге Кипрасқа бәрі ұнайды. Жарақат алғанға дейін оған Италия мен Швейцария клубтары қызығушылық танытқан», — деп қосты ол.

Еске салайық, литвалық Кипрас Кажуколовас сегіз ай бұрын тізесінің айқас байламдарын үзіп алып, ұзақ уақытқа қатардан шыққан болатын. Ол «Астана» сапында 58 матч өткізіп, үш гол соқты.

Саулюс Миколюнас — кезінде «Жальгирис», Беларусьтің «Шахтер» және шотландиялық «Хартс» клубтарында ойнаған танымал футболшы. Жартылай қорғаушы Литва құрамасы сапында 101 матч өткізген.