Норвегиялық сұрмерген ҚПЛ рекордын жаңартпақ

Шымкенттік «Ордабасының» шабуылшысы әрі Қазақстан премьер-лигасындағы сұрмергендер көшбасшысы Бьорн Йонсен ASnews.kz сайтына берген сұхбатында өзінің тамаша нәтижелілігіне пікір білдірді.

«Атырау» мен «Қайсарға» қарсы матчтарда жасаған екі хет-тригінен кейін сұрмергендер бәсекесі аяқталды ма деген сұраққа жауап берген шабуылшы әлі босаңсуға ерте екенін баса айтты:

«Жоқ, бәсеке аяқталды деген сезім болған жоқ. Мен қарсыластарымды сыйлаймын. Нидерландыда ойнағанымда осындай тәжірибем болған, ол жақта маусымның соңғы күні нағыз ессіздікке ұласуы мүмкін – біреу-міреу оп-оңай үш немесе төрт гол соғып кетуі ғажап емес. Сондықтан мен бұл туралы ойламай, ойынымды жалғастыра беремін. Менің мақсатым – командаға көмектесу. Ол сәттерде менің көмегім соғылған үш голмен көрініс тапты және бұл қатарынан екі рет қайталанды. Мен қуаныштымын, бірақ шабуылшы ретінде бұл менің тікелей жұмысым».

Қазіргі уақытта норвегиялық шабуылшы ҚПЛ-да орта есеппен әр ойында дерлік бір голдан соғып жүр. Егер Йонсен мергендер тізіміндегі көшбасшылығын сақтап қалса, ол Қазақстан чемпионатының тарихында маусым барысында 20-дан аз матч өткізіп, сұрмергендер бәсекесінде жеңіске жеткен алғашқы ойыншы атанады.

Футболшының өзі статистиканы бақыламайтынын, бірақ тарихқа ену мүмкіндігі оған шабыт беретінін мойындады:

«Бұл рекорд туралы мен тек осы аптада баспасөзден білдім. Мұнда келгенге дейін ол жайлы білмеген едім. Бұл өте жағымды статистика, бірақ мен мұндай нәрселердің көбін алдын ала қадағаламаймын – алаңда өз жұмысыңды істеп жүргенде, олар өздігінен пайда болады. Меніңше, футбол ойнағанда, жалпы спортта рекорд орнату – барлығымыздың қалайтын нәрсе. Мен үшін бұл мақтаныш, сондықтан бұл қолымнан келеді деп үміттенемін».

Бүгінгі таңда Бьорн Йонсен ҚПЛ-дың үздік сұрмергендер тізімін сенімді түрде бастап тұр. Норвегиялық шабуылшының еншісінде чемпионаттың 16 матчында соғылған 14 гол мен үш нәтижелі пас бар. Ол өзінің хет-триктерін «Атырау» мен «Қайсарға» қарсы ойындарда тіркеді. Өзінің келесі матчын «Ордабасы» бүгін, 24 қазанда ҚПЛ-дың 29-туры аясында өз алаңында елордалық «Жеңіске» қарсы өткізеді.