Париж "өртте": Чемпиондар лигасында ПСЖ жеңісінен кейін 400-ден астам адам ұсталды

Чемпиондар лигасындағы ПСЖ триумфы бүкіл Франция бойынша ауқымды тойлауға ұласты. Дегенмен, бірнеше қалада жанкүйерлердің қуанышы тез арада тәртіпсіздікке айналды.

Француз БАҚ мәліметінше, қақтығысқа қатысушылар көліктер мен велосипедтерді өртеп, автобус аялдамаларын қиратты, қалалық инфрақұрылымға зиян келтіріп, полициямен қақтығыстарға түсті. Көшелерде атыс дыбыстары естілді, ал тәртіп сақшылары бұқараны тарату үшін көз жасаурататын газ қолдануға мәжбүр болды.

Францияның ішкі істер министрі Лоран Нуньес ел бойынша барлығы 416 адамның ұсталғанын мәлімдеді. Олардың 283-і Парижде қолға түскен.

Франция ІІМ мәліметі бойынша, тәртіпсіздік кезінде жеті полиция қызметкері жарақат алды. Олардың біреуінің жағдайы ауыр деп бағаланады.

Француз БАҚ-ы қатарында жанкүйерлер арасында да зардап шеккендер бар екенін хабарлады. Le Figaro мәліметінше, екі қыз ауруханаға жеткізілген: бірі Сена өзеніне құлап кеткеннен кейін, екіншісі пышақ жарақатын алған.

Сонымен қатар, бұрын хабарланғандай, екі адам скутерде жарақат алған. Олар жанкүйерлердің жаппай жиналуынан болған жол-көлік оқиғасына ұшырап, ауыр халде жатыр.

Ең күрделі сәттердің бірі – Париж айналма жолының жабылуы болды. Француз басылымдарының хабарлауынша, жанкүйерлер тобы бірнеше рет жол қозғалысын тоқтатуға әрекеттенген.

Бұқараны тарату үшін Париж полициясы арнайы моторлы жасақтарды жұмылдырды. Францияның ІІМ басшысы айтуынша, жолды жабу әрекеті төрт рет тіркелген.

Елисей алаңында, БАҚ дерегі бойынша, шамамен 20 мың жанкүйер жиналды. Тәртіпсіздікке қатысушылардан 24 фаер мен 100-ге жуық пиротехника заттары тәркіленген.

Түнгі тәртіпсіздікке қарамастан, Франция билігі ПСЖ жеңісіне арналған ресми шараларды тоқтатқан жоқ. Мерекелік іс-шаралар 31 мамырға жоспарланған.

Париждік клуб ойыншылары қатысатын шеруге шамамен 100 мың адам жиналады деп күтілуде. Осыдан кейін футболшыларды Елисей сарайында Франция президенті Эммануэль Макрон қабылдайды.

Еске салайық, Чемпиондар лигасының финалы сенбі күні Будапештте өтті. ПСЖ Лондонның «Арсеналын» жеңіп, қатарынан екінші маусым басты еурокубок турнирінің жеңімпазы атанды. Париждік клуб үшін бұл триумф тарихи мәнге ие, алайда Францияда жеңісті атап өту жаппай тәртіпсіздікке, ұстаулар мен зардап шеккендерге ұласты.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.