"Тобыл" Конференция лигасындағы жорығын екінші раундтан бастайды

Football Meets Data мәліметінше, бұрын Ресейге тиесілі болған жолдамалардың қайта бөлінуі қазақстандық клубтарға да әсер еткен. Атап айтқанда, Қостанайдың «Тобылы» бұл жағдайдан пайда көрмек.

Ресейдің шеттетілуінен ең үлкен пайда Қазақстан Кубогының иегері — «Тобылға» тиеді. Қазақстан кубок жеңімпаздары іріктеу кезеңінде жоғарылайтын елдер қатарына енгендіктен, қостанайлық клуб УЕФА Конференция лигасындағы додасын бірден екінші іріктеу кезеңінен бастайды. Бұл бір кезеңді өткізіп, күш үнемдеуге мүмкіндік береді.

Қазақстан чемпионы «Қайрат» УЕФА Чемпиондар лигасының турнирін бірінші іріктеу кезеңінен бастайды. Бұл — Қазақстан рейтингіндегі елдер клубтары үшін қалыпты жағдай. Сонымен қатар алматылық клуб себілгендер қатарында болады, бұл алғашқы кезеңде белгілі бір артықшылық береді.

«Астана» мен «Елімай» да Конференция лигасында өнер көрсетеді, алайда олар бірінші іріктеу кезеңінен бастайды. Елордалық клуб үшін бұл үйреншікті жағдай болса, «Елімай» үшін бұл маусым еурокубоктардағы дебют болмақ.

Осылайша, Ресейдің шеттетілуі Қазақстанға УЕФА коэффициенттер кестесіндегі орнын жақсартуға нақты мүмкіндік береді, ал «Тобыл» бірден екінші кезеңнен бастау арқылы қосымша артықшылыққа ие болып отыр.