ҚФФ 30-тур бойынша төрешілердің ең даулы шешімдерін талдады

«Ұлытау» - «Атырау»

3-минут. Бірінші эпизодта айып алаңындағы жағдай қарастырылды. №13 қорғаушы сол аяғын тосып, №17 шабуылдаушы ойыншыға шалыс жасайды.

VAR қайталауынан қорғаушының допқа ойнауға тырыспай, қарсыласының алға жылжуын тоқтату үшін аяғын тосқаны көрінеді. Нәтижесінде шабуылшы құлап қалады.

Қорғаушының әрекеті айып алаңындағы ереженің анық бұзылуы болып саналады.

Қорытынды: пенальти дұрыс тағайындалған.

35-минут. Екінші эпизодта айып алаңындағы тағы бір жағдай қарастырылды. №12 қорғаушы оң аяғын тосып, №20 шабуылдаушы ойыншыға шалыс жасайды.

Баяулатылған қайталаудан қорғаушының допқа ойнауға мүмкіндігі болмағаны және шабуылшының оң аяғымен байланысқа түскені, соның салдарынан оның құлағаны көрінеді.

Ойыншылардың артында орналасқан камерадан түсірілген қайталау да қорғаушының қарсыласының алдына аяғын тосып, оның жолын бөгегенін растайды.

Қорытынды: пенальти дұрыс тағайындалған.

45+1-минут. Үшінші эпизодта айып алаңындағы тағы бір ереже бұзушылық қарастырылды. №12 қорғаушы №90 шабуылдаушы ойыншының аяғына соққы жасап, нәтижесінде ол құлап қалады.

Ойыншылардың артында орналасқан камерадан түсірілген қайталаудан қорғаушының оң аяғымен шабуылшының оң аяғына тигені көрінеді. Бұл ретте байланыс айып алаңының ішінде болған.

Эпизодты монитордан көргеннен кейін төреші дұрыс шешім қабылдап, бастапқыда тағайындалған пенальтиді күшінде қалдырды.

Қорытынды: пенальти дұрыс тағайындалған, төрешінің VAR-дан кейінгі шешімі негізді болды.

«Жетісу» - «Астана»

69-минут. Соңғы эпизодта ережені өрескел бұзу жағдайы қарастырылды. Көк формадағы №4 ойыншы жоғары жылдамдықпен қарсыласына қарай секіріп, аяғын созып, бутсасының ұштарын алға қарата бағыттайды.

Баяулатылған қайталаудан бутсы ұштарының қарсыластың жіліншігіне, тобықтан жоғары тұсына тигені көрінеді. Әрекет жоғары қарқынмен орындалып, ойыншының қауіпсіздігіне елеулі қатер төндірді.

Мұндай ереже бұзушылық өрескел тәртіп бұзу ретінде сараланады және алаңнан қуылумен жазалануы тиіс.

Қорытынды: тікелей қызыл қағаз көрсету орынды болды.