"Ақтөбе" легионері: Нани 30 жастағы ойыншы секілді

Фото: "Ақтөбе" ФК

Украиналық жартылай қорғаушы «Ақтөбе» ойыншысы Дмитрий Топалов португалиялық вингер Нанимен бір командада жаттығып, бірге ойнау туралы әсерімен бөлісті, деп хабарлайды ASnews.kz.

«Бірінші аптада мен Нанидің менімен бір командада ойнап жүргеніне сене алмадым. Үш ай бұрын мұны елестете де алмайтынмын. Кейін TikTok пен YouTube-ты ашып, оның голдарын көріп, қатты таңғалдым. Нани — мүлде басқа деңгей. Ол Роналдумен бірге ойнаған, Фергюсонның қол астында өнер көрсеткен деген ассоциация бірден келеді. Ағылшын Премьер-лигасын төрт рет жеңген. Деңгейі жағынан — ол менің мансабымдағы ең үздік әріптес.

Шеберлігі өте жоғары. 39 жасында керемет формада жүр. Мен өзім 39-да қандай болатынымды білмеймін. Бір жыл үзіліске қарамастан, ол тамаша көрінеді және бізге көмектеседі. Иә, бұл клуб үшін маркетингтік қадам екені анық. Ол әлі келмей тұрып-ақ, оның осындай “жанды ойыншы” болатынын күтпедім. Артық салмағы жоқ, қозғалысы 30 жастағыдай», – деді Топалов.

39 жастағы португалиялық футболшы Нани «Ақтөбе» сапын еркін агент ретінде толықтырды.

Бұған дейін вингер Лиссабонның «Спортинг», Англияның «Манчестер Юнайтед», Түркияның «Фенербахче», Испанияның «Валенсия», Италияның «Лацио» және басқа да клубтарда ойнаған. Португалия құрамасы сапында Нани 2016 жылғы Еуропа чемпионы атанды, ал «МЮ»-мен Чемпиондар лигасын жеңіп, Англия Премьер-лигасында төрт рет чемпион болған.