Джамал Мусиала төрт күн ішінде екі рет есінен тануының себебін түсіндірді

Алғашқы жағдай «РБ Лейпцигке» қарсы жолдастық кездесуде болды. Мусиала негізгі құрамда алаңға шығып, 81-минутта гол соқты. Арада екі минут өткенде ол есінен танып, көгалға құлады. Дәрігерлер көмек көрсеткеннен кейін футболшы өзіне келіп, алаңнан өздігінен кетті.

Төрт күннен кейін дәл осындай жағдай «Хайденхайммен» өткен кездесуде қайталанды. Мусиала 61-минутта алаңға шыққанымен, сегіз минуттан соң өзін жайсыз сезініп, қайтадан есінен танды. Медициналық қызметкерлер бірден көмек көрсетіп, кейін ойыншы киім ауыстыратын бөлмеге жеткізілді.

Екінші жағдайдан кейін Мусиала денсаулығына қатысты мәселені өзі түсіндірді. Оның сөзінше, анықталған дерт емдеуге келеді және соңғы екі кездесуде болған жағдайлар осы диагнозбен байланысты.

«Ең алдымен айтарым - менің жағдайым жақсы. Көпшіліктің алаңдап жүргенін түсінемін, сондықтан бәрін түсіндіргім келеді. Дәрігерлер маған неврологиялық бұзылыстан туындайтын қысқа мерзімді естен тану ұстамалары диагнозын қойды. Бұл емдеуге келеді және «Лейпциг» пен «Хайденхаймға» қарсы матчтарда болған жағдайларға себеп болуы мүмкін. Сырт көзге қорқынышты көрінуі ықтимал, бірақ қазір бұл менің күнделікті өмірімнің бір бөлігіне айналды. Маған қажетті медициналық көмек көрсетіліп жатыр. «Бавария» мен жақындарым әрдайым жанымда», - деді Мусиала.

Футболшы дәрігерлер оның денсаулығына қосымша қауіп жоқ екенін айтқанын да атап өтті. Невролог мамандармен кеңескеннен кейін Мусиала футбол ойнауды жалғастыру туралы шешім қабылдаған.

«Мамандармен бәрін жан-жақты талқылап, бұл жағдайды қабылдауға шешім қабылдадым. Неврологтардың рұқсатымен қалыпты өмірімді жалғастырып, сауығуыма ең көп көмектесетін іспен - футбол ойнаумен айналыса беремін. Бұл шешімнің жауапкершілігін өз мойныма алдым. Қазір өзімді жақсы сезінемін және дұрыс бағытта келе жатқаныма сенімдімін», - деп қосты ол.

«Бавария» келесі ресми кездесуін 22 тамызда өткізеді. Мюнхендік клуб Германия Суперкубогы үшін Дортмундтың «Боруссиясымен» кездеседі.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.