«Каспий» «Ұлытаумен» матчта жеңісті уысынан шығарып алды

Ақтаулық команда ойынды белсенді бастап, алғашқы таймда есеп ашуға тамаша мүмкіндік алды. 20-минутта төреші «Ұлытау» қақпасына пенальти белгіледі. Доптың жанына Рамазан Абылайхан келді, алайда «Каспий» футболшысы мүмкіндігін пайдалана алмады - оның соққысы қақпадан қиыс кетті.

Мүлт кеткен пенальтиден кейін де алаң иелері қарқынын бәсеңдеткен жоқ. «Каспий» қарсылас қақпасына қысымын жалғастырып, үзіліске дейін дегеніне жетті. 45-минутта Силла Кеба айып алаңының ортасына бағытталған пасқа бірінші жетіп, допты қақпа торына тоғытты - 1:0.

Екінші таймда «Ұлытау» есепті теңестіру үшін алға көбірек шығуға мәжбүр болды. Жезқазғандықтар шабуылдағы белсенділігін арттырса, «Каспий» қолда бар басымдығын сақтап қалуға тырысты.

72-минутта қонақтар мақсатына жетті. Бақдәулет Зулфикаров өз мүмкіндігін сәтті пайдаланып, таразы басын теңестірді - 1:1. Бұл гол ақтаулықтар үшін әсіресе өкінішті болды, өйткені бірінші таймда команда пенальтиді голға айналдырғанда, үзіліске дейін басымдығын арттыра алар еді.

Қалған уақытта екі ұжым да жеңіс голын іздеді. Алайда таблодағы есеп өзгерген жоқ. Осылайша, «Каспий» мен «Ұлытау» бір-бір ұпайдан бөлісті.

ҚПЛ, 21-тур

«Каспий» - «Ұлытау» - 1:1 (1:0)

Голдар: Кеба, 45 (1:0); Зулфикаров, 72 (1:1).

Соғылмаған пенальти: Абылайхан, 20 («Каспий», қақпадан мүлт кетті).

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.