Уго Экитике «Ньюкасл» сапына ауысуға жақын – трансфер құны €80 млн
Уго Экитике 2024 жылы «Айнтрахт» сапына қосылған еді.
Францияның шабуылшысы Уго Экитике «Ньюкасл Юнайтед» клубына ауысуға жақын. Бұл туралы ESPN хабарлайды. Футболшы ағылшын клубымен жеке келісімшарт шарттарын мақұлдады, ал «Ньюкасл» мен франкфурттік «Айнтрахт» арасындағы келіссөздер де оң нәтижемен аяқталды. Трансфер құны — 80 миллион еуро.
Ойыншының агенті қазіргі уақытта Англияда келісімнің соңғы мәліметтерін нақтылап жатыр. Айта кету керек, бұл ауысым шабуылшы Александр Исактың командадан кетуін білдірмейді – бас бапкер Эдди Хау алдағы маусымда қос шабуылшымен ойнауды жоспарлап отыр.
Экитике бұған дейін ПСЖ құрамында өнер көрсеткен. Француздық клуб бұл трансферден 20% табыс алатын болады, өйткені ойыншыны сатудағы келісімде осындай тармақ болған.
Уго Экитике 2024 жылы «Айнтрахт» сапына қосылған еді. Өткен маусымда ол 48 матч өткізіп, 22 гол соғып, 12 нәтижелі пас берді.
