Футболдан 2030 жылғы ӘЧ финалы өтетін стадион белгілі болды

Марокко финалды қабылдауға ниетті

Фузи Лекжааның айтуынша, мундиаль финалын өткізу мәртебесі Касабланкадан шығысқа қарай шамамен 60 шақырым жерде орналасқан Бенслиман қаласына беріледі.

Марокко тарапы турнирдің басты кездесуін қабылдау құқығы үшін Испаниямен бәсекелесіп жатыр. Осыған байланысты Лекжааның мәлімдемесі халықаралық футбол қауымдастығының назарын аударды.

Қазіргі уақытта Бенслиман қаласында Хасан II атындағы жаңа стадионның құрылысы жүріп жатыр. Аренаның жобалық сыйымдылығы — 115 мың көрермен.

Стадион құрылысының жалпы құны шамамен 500 миллион еуроға бағаланады. Жоба жоспарға сәйкес жүзеге асса, ол тек футбол матчтарын өткізуге арналған әлемдегі ең үлкен стадион атанбақ.

Айта кетейік, Фузи Лекжаа бұл туралы Бузника қаласында өткен саяси жиында мәлімдеген. Оның сөзінше, Бенслиманға әлем чемпионатының финалын қабылдау құрметі бұйырады.

2030 жылғы ӘЧ үш құрлықта өтеді

2030 жылғы футболдан әлем чемпионатының негізгі матчтарын Марокко, Испания және Португалия қабылдайды.

Ал мундиаль тарихының 100 жылдығына орай турнирдің алғашқы үш кездесуі Оңтүстік Америкада ұйымдастырылады. Бұл ойындар Уругвай, Аргентина және Парагвайда өтеді.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.