Дастан Сатпаевтың нарықтағы құны өзбек футболшыларының алдын орады
Өзбекстандық Upl.uz сайты «Қайрат» шабуылшысы Дастан Сатпаевтың трансферлік құнының өсуіне назар аударды.
16 жастағы шабуылшының бағасы жақында 1,3 миллион еуроға (шамамен 770 млн теңге) артқан. Қазір оның нарықтағы құны — 1,8 млн еуро деп көрсетілген.
«Бұл өзгеріс оның рейтингтегі орнын едәуір көтерді. Сатпаев өзбек футболының екі өкілін — Акмал Мозговой мен Абдувохид Нематовты артта қалдырды. Екеуі де «Насаф» клубында ойнайды, ал олардың әрқайсысының құны 1,5 млн еуро көлемінде», – деп жазады Upl.uz.
Осылайша, Transfermarkt дерегінше, Сатпаев қазір Орталық Азиядағы ең қымбат жас ойыншылардың бірі саналады.
Атап өтсек, биылғы маусымда Сатпаев ҚПЛ-да 13 матч өткізіп, 8 гол соғып, 4 нәтижелі пас берген. Ол қазіргі таңда лигадағы ең үздік сұрмерген саналып отыр. Екінші орында — «Астана» шабуылшысы Марин Томасов (7 гол).
