Ресми: «Реал» өз тарихындағы ең қымбат трансферді рәсімдеді

Корольдік клуб Германияның «РБ Лейпциг» командасында өнер көрсеткен 19 жастағы вингер Ян Диомандені сапына қосқанын жариялады.

Футболшы «Реалмен» 2033 жылдың 30 маусымына дейін жарамды ұзақ мерзімді келісімшартқа қол қойды. Трансфердің бастапқы құны 125 миллион еуроны құрады, ал бонустардың орындалуына байланысты бұл сома 140 миллион еуроға дейін өсуі мүмкін. Осылайша Диоманде мадридтік клуб тарихындағы ең қымбат трансфер атанды.

Ивуариялық ойыншы 2025 жылдан бері «РБ Лейпциг» сапында өнер көрсетті. Алғашқы толық маусымында ол 36 матчқа қатысып, 13 гол соғып, 10 нәтижелі пас берді. Жас шабуылшы қысқа уақыт ішінде Бундеслиганың ең жарқын жаңалықтарының біріне айналды.

2026 жылдың жазында Диоманде Кот-д’Ивуар құрамасымен әлем чемпионатына қатысты. Ол турнирде төрт матч өткізіп, бір нәтижелі паспен көзге түсті. Африкалық құрама өз тарихында алғаш рет әлем чемпионатына қатысып, жарысты 1/16 финал кезеңінде аяқтады.

Transfermarkt порталының мәліметінше, футболшының қазіргі нарықтық құны 90 миллион еуроға бағаланады. Алайда мадридтік клуб жас талантты өз қатарына қосу үшін әлдеқайда жоғары қаржы жұмсады.

Диоманденің трансфері «Реалдың» клубтық рекордын да жаңартты. Бұған дейінгі ең қымбат сатып алу Джуд Беллингемге тиесілі болатын. Ағылшын жартылай қорғаушысының трансфері бонустармен бірге шамамен 127 миллион еуроға бағаланған еді.

Сонымен қатар мадридтік клуб өз көшбасшыларының бірін де сақтап қалды. Бұған дейін «Реал» Винисиус Жуниормен жаңа ұзақ мерзімді келісімшартқа отырып, алдағы жылдары команданың шабуыл шебін дәл осы бразилиялық пен Ян Диоманде төңірегінде құруды жоспарлап отырғанын көрсетті.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.